Pentagoni konfirmoi se Shtetet e Bashkuara me Korenë e Jugut kishin rënë dakord që të mos kryejnë më manovrat e përvitshme ushtarake me qëllim që të ndihmojnë përpjekjet diplomatike mes Amerikës dhe Koresë së Veriut.
Sipas një deklarate, shefi i Pentagonit Patrick Shanahan njoftoi se shefat e mbrojtjes së SHBA-së dhe Koresë së Jugut kanë vendosur që t’i japin fund ushtrime ushtarake me qëllim “që të ulim tensionet dhe të mbështesim përpjekjet tona diplomatike për të arritur denuklearizim të plotë të Gadishullit Korean”.
Për të inkurajuar bisedimet, Shtetet e Bashkuara dhe Koreja e Jugut kanë pezulluar një numër ushtrimesh ushtarake që nga takimi i parë i vitit të kaluar midis Kim Jong-un dhe Trump.
Ky vendim vjen pas samitit ndërmjet presidentit Donald Trump dhe liderit, Kim Jong Un në Vietnam, ku dy liderët nuk arritën një marrëveshje. Kujtojmë se Presidenti Trump në të kaluarën ka shprehur shqetësimin e tij lidhur me koston e ushtrimeve ushtarake me Korenë e Jugut./E.M
