Shtetasit amerikanë dhe francezë që ndodhen në vend, sipas rekomandimit të ministrive të Jashtme të dy vendeve, duhet të largohen menjëherë nga Rusia, për shkak të kufizimeve ajrore që vijnë si pasojë e sanksioneve për pushtimin e Ukrainës.
“Qytetarët amerikanë duhet të largohen menjëherë nga Rusia, duke përfituar nga opsionet që janë ende në dispozicion”, thuhej në një njoftim sigurie të postuar në ambasadën amerikane në Moskë më 27 shkurt. Ambasada po u bën thirrje amerikanëve që të kenë “një plan emergjence që nuk bazohet në ndihmën e qeverisë amerikane”.
Në Paris, Ministria e Jashtme franceze njoftoi se të gjithë qytetarët francezë që bëjnë vizita afatshkurtra në Rusi duhet të largohen menjëherë nga vendi, duke përmendur kufizimet në rritje të udhëtimit ajror për shkak të sanksioneve të vendosura ndaj Rusisë për pushtimin e Ukrainës.
“Për shkak të kufizimeve në rritje në trafikun ajror midis Rusisë dhe Evropës, një rekomandim i fortë po u bëhet francezëve që po kalojnë nëpër Rusi (turistë, vizitorë, studentë, profesionistë me mision) që të ndërmarrin hapa për t’u larguar nga vendi pa vonesë”, shton ministria dhe kërkon “të shtyhet çdo lëvizje drejt Rusisë”.
Më herët, presidentja e Komisionit Ursula von der Leyen njoftoi mbylljen e hapësirës ajrore të Bashkimit Evropian për avionët rusë. “Ne po mbyllim hapësirën ajrore të BE-së për rusët. Ne propozojmë një ndalim të të gjithë avionëve në pronësi ruse, të regjistruar nga Rusia ose të kontrolluara nga Rusia,” tha ajo, duke shtuar se “këta avionë nuk do të mund të ulen më, të largohen ose fluturojnë mbi territorin e BE-së”./Opinion.al
