Të paktën shtatë persona kanë vdekur në një aksident masiv të regjistruar mëngjesin e së hënës në Luziana të SHBA-së.
Sipas CNN të paktën 158 automjete, u përfshinë në këtë aksident ndërsa më shumë se 25 njerëz u dërguan në spitale me lëndime që varionin nga të lehta në ato kritike.
Meteorologët më herët thanë se shkak i aksidentit ishte dukshmëria e kufizuar e shkaktuar nga mjegulla, në perëndim të New Orleans.
Sipas Shërbimit Kombëtar të Motit, mjegulla e dendur kishte bërë që dukshmëria të ishte në më pak se 10 metra.
Disa nga automjetet u dogjën pas përplasjes fillestare, thanë autoritetet. Një nga automjetet e përfshira në rrënojat ishte një kamion cisternë që mbante “lëng të rrezikshëm”, tha policia pa dhënë detaje mbi substancën.
Policia po punonte të hënën në mbrëmje për të lëvizur kamionin. “Pasi të hiqet cisterna, do të jetë e mundur të vlerësohen dëmet e automjeteve në zonë. Është e mundur që të zbulohen edhe viktima të tjera”, shtoi policia e shtetit.
Autoritetet i kanë kërkuar publikut që të kontaktojë nëse kanë një anëtar të familjes të zhdukur që po udhëtonte nëpër zonë të hënën në mëngjes.
Guvernatori i Luizianës, John Bel Edwards, tha se po lutej për viktimat dhe të plagosurit.
“Kombinimi i tymit të zjarrit dhe mjegullës së dendur është i rrezikshëm dhe unë dua të inkurajoj të gjithë banorët e Luizianës në zonat e prekura që të kenë kujdes ekstrem gjatë udhëtimit,” tha Edwards në X, i njohur më parë si Twitter./Opinion.al
