Policia e Shtetit i ka bërë thirrje biznesmenëve që të tregohen vigjilentë ndaj rasteve të mashtrimit dhe të denoncojnë pranë strukturave të policisë nëse janë viktima të kësaj veprimtarie kriminale.
Reagimi i uniformave blu vjen pasi së fundmi janë evidentuar dhe goditur disa raste të shantazhit ndaj pronarëve apo administratorëve të bizneseve.
Mashtruesit thonë se flasin në emër të funksionarëve publikë dhe shtetërorë për të dhënë shuma parash për llogari të tyre.
“Policia e Shtetit, bazuar në inteligjencën policore, ka intensifikuar punën që nëpërmjet strukturave të specializuara, të parandalojë raste të shantazhimit për dhënie pasurie.
Nisur nga raste të evidentuara dhe të goditura kohët e fundit, në bashkëpunim me Prokurorinë, si dhe duke marrë shkas nga disa kallëzime të reja në strukturat e Policisë së Shtetit, nga pronarë apo administratorë biznesesh, të cilët kanë deklaruar se janë shantazhuar nga shtetas të paidentifikuar, në emër të funksionarëve publikë dhe shtetërorë, për të dhënë shuma parash për llogari të tyre, Policia e Shtetit apelon edhe një herë për të gjithë operatorët ekonomikë që:
“Të tregohen vigjilentë ndaj rasteve të tilla të mashtrimit dhe të denoncojnë menjëherë pranë strukturave të Policisë së Shtetit, vendore apo qendrore, çdo rast të dyshuar ose nëse janë viktima të kësaj veprimtarie kriminale”.
Theksojmë se individët apo grupet, për realizimin e qëllimit të tyre, po përdorin aplikacione të ndryshme telefonike për të komunikuar me operatorë ekonomikë, duke iu kërkuar donacione në emër të funksionarëve publik apo shtetërorë. Prandaj, cilido që konstaton të tilla komunikime apo ka rënë pre e tyre, të denoncojë menjëherë”, njofton policia.
