Mosrealizimi i planit për mbledhjen e taksave të plazheve private ka detyruar Bashkinë e Durrësit të tregohet kategorike në këtë fillim të sezonit turistik veror.
“Nuk na lënë të dalim në det” Rrethohet me gardh plazhi i Shën Pjetrit, protestojnë banorët Kryetari i Bashkisë, Vangjush Dako, deklaroi se do t’i fusë në “kurth” bizneset e papërgjegjshme që nuk kanë paguar taksën e shfrytëzimit për sezonin e vjetshëm, duke mos u dhënë leje për sezonin e ri pa paguar për dy vite bashkë.
“Nuk do të jepet asnjë leje për plazhe private subjekteve që nuk kanë paguar detyrimet për shfrytëzimin e tyre pranë bashkisë. Kemi mbledhur shumë pak të ardhura nga plazhet private, pavarësisht se e ulëm ndjeshëm taksën, nga 300 mijë lekë të rinj në 100 mijë lekë, subjektet nuk erdhën për të paguar. Ne kemi gjetur një formulë për të mbledhur në 100% taksën e plazheve private, duke u kërkuar subjekteve të paguajnë për dy vite, sezonin 2015 dhe 2016, i cili pritet të startojë shumë shpejt. Nuk do të jepet në mënyrë kategorike asnjë leje për subjektet që rezultojnë debitore pranë Bashkisë Durrës”, deklaroi Dako.
Taksa e plazheve private është mbledhur në nivelin 29% vitin e shkuar, ndonëse ajo u ul me vendim të Këshillit Bashkiak, në tetor të vitit 2015. Nga të dhënat zyrtare mësohet se gjatë muajve të verës 2015, taksën e paguan shumë pak subjekte, me pretendimin se numri i ulët i pushuesve reflektoi dukshëm në një krizë të ardhurash në plazh.
Nga “Ura e Dajlanit” deri në “Iliria”, bashkia licencoi 100 plazhe, por vetëm 25 prej tyre, kryesisht hotelet dhe rezidencat turistike, i kanë paguar detyrimet. Kjo detyroi Bashkinë e Durrësit, që me vendim të Këshillit Bashkiak ta ulte taksën nga 300 mijë lekë në 100 mijë lekë. Edhe pse taksa u ul ndjeshëm, subjektet injoruan duke mos paguar as 30% të shumës që duhet të paguanin për parcelat që shfrytëzonin.
Duke marrë shkas nga viti i kaluar ku shumë pak subjekte paguan detyrimet, kryebashkiaku Dako tregon se ka gjetur formulën e duhur, duke mos dhënë asnjë leje për subjektet debitore pa paguar për të dy sezonet njëherësh.
Por rezultatet mbeten për t’u parë, pasi tarifa prej 300 mijë lekësh për 200 metra katrorë ka sjellë jo pak abuzime dhe ndërhyrje klienteliste në drejtim të pagimit të saj. Një pjesë e subjekteve i janë shmangur pagesës në vite dhe sërish janë pajisur me leje shfrytëzimi nga ana e Bashkisë Durrës./Panorama
