Pas miratimit të platformës për dialogun nga Kuvendi i Kosovës nuk kanë vonuar dhe reagimet e Beogradit. Për Drejtorin e të ashtuquajturës Zyrë për Kosovën, Marko Gjuriç, përmes miratimit të këtij dokumenti, Prishtina dërgoi një mesazh se ky është fundi i dialogut.
“Duke adoptuar një platformë që thotë se rezultati i vetëm i mundshëm i dialogut është njohja, pa trajtuar të drejtat dhe pozitën e serbëve, tregon se Prishtina në këtë mënyrë ka dërguar një mesazh se ky është fundi i dialogut”, tha Gjuriç në një konferencë për mediat.
Sipas tij, vendimi i autoriteteve të Prishtinës e ka vënë Serbinë në pozitën më të keqe që nga viti 2011 ndërsa informoi se Presidenti Aleksandër Vuçiç ka thirrur nesër një takim urgjent të Këshillit për siguri nacionale.
“Ne nuk do të ngutemi, por Serbia do të jetë në gjendje të mbrojë interesat kombëtare dhe shtetërore sa i përket çështjes së Kosovës, pozitës dhe të drejtave të serbëve në Kosovë dhe në të gjithë Serbinë” përfundoi Gjuriç.
Me 61 vota pro dhe 1 abstenim, Kuvendi i Kosovës miratoi sot platformën për dialogun mbi Marrëveshjen përfundimtare gjithëpërfshirëse dhe ligjërisht të detyrueshme të normalizimit të marrëdhënieve mes Republikës së Kosovës dhe Serbisë.58 deputetë votuan me elektronikë ndërsa 3 të tjerë me ngritje dore. Bëhet fjalë për tre deputetët e PSD-së; Dardan Molliqaj, Shqipe Pantina dhe Aida Dërguti.Platforma është hartuar nga ekipi negociator që udhëhiqet nga Shpend Ahmeti e Fatmir Limaj. /Opinion.al
