Një ngjarje e paprecedentë ndodhi 15 ditë më parë në qytetin serb të Srenjanjinit, ku një 46-vjeçare vrau burrin e saj, e preu me sharrë elektrike duke ia bërë trupin copa copa dhe më pas gatoi organet e brendshme.
Mediat e huaja kanë zbardhur detaje të reja lidhur me krimin makabër. Viktima ishte katër vite më i vogël se autorja e arrestuar, ndërsa punonjësit e policisë që ndodheshin në vendin e krimit, folën për një skenë të neveritshme me ambientet e shtëpisë të mbuluar me gjak.
E përditshmja serbe Blic publikoi informacione rreth krimit, duke ngritur pyetje se si një grua e imët arriti të vriste një burrë të fortë trupmadh, të priste trupin e tij dhe më pas t’i gatuante organet. Veshkat, zemra, organet gjenitale, madje edhe e gjithë këmba e viktimës, sipas dëshmitarëve që mbetën anonimë ishin gatuar.
Fqinjët thanë për mediat lokale se ishin të befasuar nga vrasja brutale, duke theksuar se 46-vjeçari nuk ishte problematik. Motivet e krimit janë duke u hetuar nga autoritetet. Ndërkohë ish-bashkëshorti i 46-vjeçares vlerëson se reagimi i saj i dhunshëm është ndoshta për faktin se viktima nuk donte në shtëpi dy fëmijët e gruas, nga martesa e parë.
Dy fëmijët e mitur u dërguan tek babai i tyre, ndërsa po monitorohen nga ekspertët për ndihmë psikologjike.
