TIRANE – Është ndarë nga jeta sot në moshën 55 vjeçare “Mjeshtri i Merituar i Sportit”, peshngritësi i njohur Mirjan Hakani. Ai vuante nga një sëmundje në zemër dhe dy vite më parë i ishte nënshruar një ndërhyrje në zemër. Asokohe ai rrëfeu se për realizimin e ndërhyrjes e kishte ndihmuar kryeministri Rama.
“Në fakt, për hir të së vërtetës vuaja prej kohësh nga zemra, por e kisha të pamundur për arsye objektive t’i nënshtrohesha një ndërhyrjeje jo vetëm specifike, por dhe të kushtueshme nga pikëpamja financiare e që ishte e papërballueshme për mua dhe familjen time. Kisha tentuar të isha në kontakt edhe drejtuesit kryesorë të Qeverisë së mëparshme, por për arsyet që ata i dinë nuk ma mundësuan ndërhyrje. I dërgova një mesash Kryeministrit Edi Rama, duke i shpjeguar situatën time: “Edi, jam duke vdekur. Duhet me patjetër dhe në mënyrë urgjente të bëj një ndërhyrje shumë komplekse në zemër”. Menjëherë u morën masat e duhura dhe, në harkun e pesë-gjashtë ditëve u organizua shtrimi im në spital”, do të shprehej ai në një intervistë të realizuar në dhjetor të vitit 2013, një javë pas ndërhyrjes.
Ai do të mbahet mend si një nga peshëngritësit më të mirë të Shqipërisë, dominues në peshat e rënda në vitet 80-të, me shumë tituj kampion dhe fitore në Kupën e Shqipërisë, si dhe medaljet e arta në kampionatin ballkanik në 1987.
Ai ishte pjesë e emrave të shquar të asaj kohe si Aleksandër Kondo, Agron Haxhihyseni, Muharrem Berisha apo Erlin Nikolla. Pas lënies së sportit punoi si drejtues sportiv, si drejtor i sporteve në Bashkinë e Tiranës dhe shef i klubit shumësportësh Partizani.
