Një 32-vjeçare, administratore e një poste private, e cila tregtonte mallra të kontrabanduara dhe fshihte të ardhurat e përfituara nga ky aktivitet është shpallur në kërkim nga policia.
Uniformat blu bëjnë me dije se gjithashtu janë proceduar në gjendje të lirë 3 shtetas të punësuar për tregtimin dhe shpërndarjen e mallrave të kontrabanduara.
“Specialistët e Seksionit për Hetimin e Krimeve Ekonomike dhe Financiare në DVP Tiranë, në vijim të punës për parandalimin, evidentimin dhe goditjen e veprimtarisë kriminale në fushën e kontrabandës me mallra, pas një pune të mirëfilltë hetimore, organizuan dhe finalizuan operacionin policor të koduar “Pakot postare 2”. Si rezultat i këtij operacioni u shpall në kërkim shtetasja A. D., 32 vjeçe, banuese në Tiranë, administratore e një poste private. Gjithashtu, nisi procedimi në gjendje të lirë për shtetasit L. M., 37 vjeç, A. K., 22 vjeç dhe A. A., 40 vjeç, të tre banues në Tiranë, punonjës të kësaj poste”-njofton policia.
Gjatë kontrollit të magazinave të postës në administrim nga shtetasja A. D., oficerët e Policisë gjetën dhe sekuestruan, në cilësinë e provës materiale, 93 pako me mallra të ndryshme veshje, produkte kozmetike, pajisje elektronike etj, pa fatura tatimore shoqëruese apo deklarata doganore për origjinën e mallrave.
Nga veprimet hetimore dyshohet se mallrat e sekuestruara janë futur kontrabandë në Shqipëri.
Vijon puna hetimore për dokumentimin e plotë të kësaj veprimtarie të kundërligjshme.
