Zbardhen detaje nga operacioni i djeshëm i policisë Kufitare në Portin e Durrësit, ku u sekuestruan 450 kg kanabis.
Referuar burimeve zyrtare, ka nisur procedimi penal për një person ndërsa dy të tjerë janë shpallur në kërkim.
Nën hetim është drejtuesi i mjetit me inicialet Sh.J, 61-vjeç, banues në Tiranë. Në kërkim janë shpallur shtetasit A.R. 24-vjeç, E.S, 28-vjeç, të dy banues në Tiranë.
Mësohet se gjatë kontrollit të ushtruar në Pikën e Kalimit Kufitar Durrës, në mjetin tip “Scania”, pas dyshimeve nga Specialistët se në brendësi të tij kishte lëndë narkotike, për verifikim më të hollësishëm u kontrollua në Skaner.
Kamioni ishte i ngarkuar me arka plastike, bosh dhe lënda narkotike ishte e futur në të gjitha këmbët e arkave, ku pas peshimit rezultoi në total një sasi rreth 450 kg lëndë narkotike e dyshuar e llojit kanabis.
Lënda narkotike u sekuestrua në cilësinë e provës materiale.
