30 kallëpe me lëndë plasëse tritol, 4 granata dore dhe 2 ndezës granatash janë sekuestruar nga policia në Vlorë.
Në një njoftim për mediat policia bën me dije se pas informacionit të siguruar përmes inteligjencës policore, për një person që lëvizte në lagjen “Isa Boletini”, Vlorë, dhe mbante një çantë brenda së cilës dyshohej se kishte sende të kundërligjshme, oficerët e Policisë, bazuar fillimisht në informacione sipas të cilave dyshohej për lëndë narkotike, kanë shkuar menjëherë në adresën e dhënë, ku kanë bllokuar hyrje-daljet e lagjes dhe kanë vijuar kontrollin e imtësishëm, për të lokalizuar personin e dyshuar.
Gjatë kontrollit në një banesë të braktisur, shërbimet e Policisë gjetën dhe sekuestruan 30 kallëpe me lëndë plasëse tritol, 4 granta dore dhe 2 ndezës grantash, që personi që i posedonte i kishte braktisur për t’i shpëtuar policisë.
Ndërkohë vijon puna për kapjen e poseduesit/ve të lëndës plasëse dhe zbardhjen e plotë të këtij rasti.
Materialet iu referuan Prokurorisë, për veprën penale “Mbajtja pa leje dhe prodhimi i armëve, shpërthyese dhe municionit”.
