Tre persona janë arrestuar nga policia e Tiranës, pasi u janë sekuestruar lëndë narkotike të llojit kanabis.
Policia bën me dije se ka arrestuar Llesh Doçi, 31 vjeç, Lirim Sopoti, 40 vjeç, dhe Xhuliano Marando (Likaj), 30 vjeç.
Autoritetet informojnë se shtetasi Llesh Doçi, është ndaluar nga shërbimet e Policisë në rrugën “Rexhep Tarja”, dhe gjatë kontrollit fizik të tij, shërbimet e Policisë, i gjetën sasi lënde të dyshuar narkotike kanabis.
Gjatë kontrollit të banesës, ku ndodheshin shtetasit Lirim Sopoti dhe Xhuliano Marando (Likaj) shërbimet e Policisë sekuestruan në cilësinë e provës materiale, dy thasë të zinj me lëndë të dyshuar narkotike kanabis me peshë 10 kg.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.
