Ministri i Brendshëm Taulant Balla, ka dalë në një konferencë për mediat, këtë të enjte, ku po bën një bilanc të vitit që kaloi, për dikasterin që ai drejton.
Gjatë fjalës së tij Balla u ndal ndër të tjera te aksioni i qeverisë në vitin 2023 për sekuestrimin e ndërtimeve pa leje apo kateve shtesë të bëra pa leje nëpër kulla shumëkatëshe.
Balla bëri të ditur se buxheti i shtetit ka arkëtuar 10.5 milionë Euro nga 9 objekte që janë sekuestruar, investitorët e të cilave kanë paguar detyrimet financiare me qëllim legalizimin e tyre.
“Kemi për 9 objektet e para si arkëtim të ardhura në buxhet 10.5 milionë Euro. Për 4 prej tyre procesi i pagesës është përfunduar dhe për ditët në vijim shlyhet pjesa tjetër”-tha Balla.
Ministri Balla dha edhe shifra për hyrje-daljet në Shqipëri gjatë vitit 2023.
“Siguria publike gjatë 2023 ishte test i rëndësishëm që na ka certiifkuar si destinacion i sigurt turistik. Ne kemi regjistuar në hyrje-dalje 33.7 milionë shtetas ose rreth 5.2 milionë shtetas më shumë se viti 2022 të kontrolluar në pikat e kalimit kufitar. Janë regjistruar në hyrje-dalje 9.1 milionë automjete dhe krahasuar me vitin 2022 janë plot 900 mijë automjete më shumë. Janë goditur 87 raste të mosdeklarimit të të hollave me një shumë të konfiskuar 2.6 milionë Euro. Janë goditur 58 raste kontrabande dhe 10 raste të trafikimit të mjeteve motorike. Policia në bashkëpunim me Prokurorinë kanë goditur 154 raste të emigracionit të paligjshëm”-tha Balla.
