Guvernatori i Bankës së Shqipërisë, Gent Sejko thotë se sektori bujqësor ka performancën më të dobët ndër sektorët madhorë të ekonomisë shqiptare. Më tej, ai shton se kreditimi i sektorit bujqësor ka një impakt dy herë më të madh në reduktimin e varfërisë krahasuar me kreditimin e sektorëve të tjerë të vendit.
Gent Sejko: Sektori bujqësor ka performancën më të dobët ndër sektorët madhorë të ekonomisë shqiptare, ecuri e cila diktohet nga disa probleme strukturore, ku veçoj: fragmentarizimin e tokës, nivelin e ulët të mekanizimit, si dhe integrimin e pakët horizontal dhe vertikal midis fermerëve, tregut dhe sektorëve të tjerë të ekonomisë. Në të njëjtin plan, kredia për sektorin bujqësor përbën më pak se 2% të kredisë bankare për bizneset. Ecuria ende larg dëshirës dhe nevojave që sektori bujqësor ka për kredi, pasqyron si realitetin e rrezikut që mbart kreditimi i këtij sektori, si pasojë e natyrës së aktivitetit, e problemeve të tij strukturore, si dhe e mungesës së kolateralit, ashtu edhe kostot e larta të kreditimit. Megjithatë, rritja e vëmendjes suaj ndaj kreditimit të tij është një çështje me rëndësi strategjike për zhvillimin e vendit. Studimet e kryera në këtë drejtim, kanë evidentuar se kreditimi i sektorit bujqësor ka një impakt dy herë më të madh në reduktimin e varfërisë krahasuar me kreditimin e sektorëve të tjerë të vendit.
Gjatë fjalës së tij në tryezën e diskutimit mbi financimin në bujqësi, Sejko shprehet se Banka e Shqipërisë ka vënë në dispozicion një fond prej 25 miliardë Lekësh për të mbështetur kreditimin e bizneseve mikro, të vogla dhe të mesme. Ky program sipas Sejkos ofron një mundësi për hapjen e një kapitulli të ri në kreditimin e sektorit bujqësor.
Gent Sejko: Gjykoj se nisma e fundit e Bankës së Shqipërisë për miratimin dhe vënien në zbatim të një Programi Financimi për biznesin mikro, të vogël dhe të mesëm, ofron një mundësi për hapjen e një kapitulli të ri në kreditimin e sektorit bujqësor. Ky program vjen në përgjigje të shqetësimit e kërkesave të vetë biznesit, por edhe të analizave tona, të cilat konstatojnë një ecuri të diferencuar të kreditimit ndërmjet bizneseve të analizuara sipas madhësisë. Megjithëse biznesi mikro, i vogël dhe i mesëm përbën shtyllën kurrizore të ekonomisë shqiptare, duke gjeneruar diçka më shumë se 80% të vlerës së shtuar dhe duke punësuar pothuajse 80% të fuqisë punëtore në vend, ky sektor është katër herë më pak i kredituar se biznesi i madh dhe korporatat. Ky fenomen vjen si pasojë e shumë faktorëve, një pjesë të të cilëve jemi përpjekur t’i adresojmë nëpërmjet këtij programi.
Në këto rrethana, programi i financimit të biznesit mikro, të vogël e të mesëm, ofron mundësinë për një hop cilësor në zhvillimin e këtyre bizneseve në afatin e shkurtër, krijon hapësirë për adresimin e problemeve strukturore që frenojnë aksesin e tyre në kredi në afatin e mesëm, si dhe nxit partneritetin dhe besimin reciprok midis tyre dhe industrisë bankare në afatin e gjatë. Duke përfituar nga rasti, më lejoni të theksoj se Banka e Shqipërisë ka vënë në dispozicion një fond prej 25 miliardë Lekësh të destinuar për të mbështetur kreditimin e bizneseve mikro, të vogla dhe të mesme. Ky program, i cili do të vihet në zbatim nëpërmjet bankave tregtare, ofron mundësi për uljen e ndjeshme të kostos së kredisë për këto biznese, e cila mund të arrijë edhe deri në 2%, por gjithsesi, nuk do të kalojë nivelin e 3.5%, duke iu krijuar atyre mundësi të investojnë në asete fizike, mjete kapitale apo platforma teknologjike, të cilat i shërbejnë rritjes së produktivitetit. Gjithashtu, dëshiroj të sqaroj se fondi ynë do të vihet në dispozicion të bankave tregtare, të cilat – nëpërmjet procesit të tyre të seleksionimit dhe me rrezikun e tyre – do ta kanalizojnë atë në kredi për bizneset.
