Sekretari i përgjithshëm i NATO-s, Jens Stoltenberg, i bëri thirrje Kosovës dhe Serbisë të tregohen të përmbajtura, të shmangin retorikën nxitëse dhe të fokusohen në dialog.
Mesazhin e përcolli gjatë një konference në prag të takimit të ministrave të mbrojtjes në Bruksel. Stotlenberg kujtoi se aleanca ka rritur praninë ushtarake, me gati 1 mijë trupa shtese dhe e është e gatshme të garantojë sigurinë në rajon.
“Kemi parë tensione në Kosovë dhe në pjesë të tjera të Ballkanit Perëndimor në muajt e fundit. Unë isha për vizitë në rajon para Krishtlindjeve. Mesazhi im kryesor ishte se të gjitha palët duhet të përmbahen nga fjalori nxitës dhe veprimet që mund të shkaktojnë rritje tensionesh në rajon. Aleanca ka rritur praninë ushtarake si përgjigje ndaj sfidave të sigurisë, edhe pse rruga e vetme për zgjidhjen e problemeve është dialogu”, tha Stoltenberg.
Shefi i aleancës ushtarake perëndimore u kujdes gjithashtu t’i përcillte mesazhin Rusisë nuk duhet të ketë asnjë dyshim rreth gatishmërisë së NATO-s për të mbrojtur secilin shtet anëtar. Stoltenberg deklaroi se 18 nga 31 vende të NATO-s do të përmbushin targetin e 2 përqindshit të prodhimit të brendshëm bruto për shpenzimet e mbrojtjes. Sipas tij, totali i shpenzimeve ushtarake do të arrinte një tjetër rekord ketë vit, teksa lufta ukrainase hyn në vitin e saj të tretë.
“Këtë vit, pres që 18 aleatë të shpenzojnë 2 përqind të GDP-së në mbrojtje. Ky është një tjetër numër rekord. Në 2024-n, aleatët e NATO-s në Europë do të investojnë një total prej 380 miliardë dollarësh për mbrojtjen. Po shënojmë përparim konkret”, tha Stoltenberg.
Për herë të parë, Berlini do të përmbushë targetin e 2 përqindëshit që prej përfundimit të luftës së ftohtë.
