Pas humbjes në zgjedhjet e 11 majit, Dashamir Shehi ka dhënë dorëheqjen nga koalicioni Djathtas për Zhvillim Kombëtar.
Përmes një konference për mediat, kreu i këtij koalicioni tha se mban përgjegjësi për humbjen në zgjedhje dhe largohet duke iu hapur rrugën njerëzve më të rinj.
“Duhet të pranojmë që Rama arriti këtë rezultat edhe për fakt të gabimeve të opozitës edhe tonin brenda kësaj. Përgjegjësia bie kryesish mbi lidershipin e partive opozitare duke filluar nga koalicioni Djathtas për Zhvillim.
Kjo është një përgjegjësi që e mbaj unë personalisht. Për këtë motiv largohem nga drejtimi i koalicionit për t’i hapur rrugë njerëzve më të rinj se unë dhe ndoshat më energjikë”, u shpreh Shehi.
Ai thekson se për politikë do të vazhdojë të flasë për aq sa ka njohuri.
“Kam dhënë dorëheqjen me i dhënë dorë të rinjve. Pastaj për politikë, do flas gjithnjë për aq sa di. S’ka ndonjë gjë për turp, është normale në politikë duhet ta pranojmë që kemi humbur, po kjo s’do të thotë që do humbim surratin. Nga kjo pikëpamje, do flas do merrem, po të drejtoj koalicion…Gjykoj se duhet t’ia lëmë të rinjve, jo se janë më të mençëm se unë ore jo… po normal!”, ka thënë Shehi.
Kujtojmë se koalicioni Djathtas për Zhvillim Kombëtar, i drejtuar nga Dashamir Shehi nuk arriti të marrë asnjë mandat në zgjedhjet e 11 majit.
