Samuel Eto’o do të vazhdojë karrierën si futbollist pasi ka arritur një marrëveshje për të luajtur në Premier League të Rusisë me skuadrën e Amkar. 35-vjeçari, i cili mbylli marrëdhënien me Antalyaspor në mënyrë konsensuale, largohet nga Turqia pas 18 muajsh, për të vazhduar karrierën me klubin e 11-të të ndryshëm në përvojën e tij si futbollist. Për Eto’o do të jetë një rikthim në Rusi, ku luajti për tre sezone me Anzhi Makhachkala, nga viti 2011 në vitin 2014.
Në karrierën e tij, Samuel Eto’o ka fituar tre herë titullin kampion në Spanjë, një herë titullin në Serie A dhe tre herë Champions League. Në skenën ndërkombëtare, kamerunasi fitoi dy herë Kupën e Kombeve të Afrikës, një medalje ari në Lojërat Olimpike dhe në vendin e tij konsiderohet si një legjendë. Duke llogaritur Real Madridin, si klubin e parë të karrierës së tij si profesionist, deri tani Eto’o ka luajtur me dhjetë skuadra të ndryshme. FC Amkar do të jetë skuadra e 11-të.
11 skuadra me të cilat Samuel Eto’o ka firmosur kontrata si profesionist janë: (1997-2000) Real Madrid, (1997-1998) Leganes, (1999) Espanyol, (2000-2004) Mallorca, (2004-2009) Barcelona, (2009-2011) Inter, (2011-2013) Anzhi Makhachkala, (2013-2014) Chelsea, (2014-2015) Everton, (2015-2016) Sampdoria, (2016-2017) Antalyaspor, (2017) FC Amkar.
