Tirana sot po mirëpret Samitin e Komunitetit Politik, forum i cili sjell në kryeqytetin shqiptar 52 liderë europianë, përfshirë këtu Presidentë, Kryeministra, liderë të BE-së, NATO-s dhe OSBE.
Pak minuta më parë, kryetarja e Kuvendit Elisa Spiropali ka pritur në Kryesinë e Kuvendit, Presidenten e Parlamentit Europian, Roberta Metsola.
Spiropali e priti Metsolan në hyrjen ceremoniale të Kuvendit, në Bulevardin “Dëshmorët e Kombit”.
Kujtojmë se Samiti i organizuar nga Presidenti i Këshillit Evropian, António Costa dhe Kryeministri Edi Rama po mbahet në Sheshin “Skënderbej” dhe do të përfundojë me konferencën përmbyllëse në orën 18:30 të kryeministrit Edi Rama dhe kryeministres së Danimarkës, si vendi që do të presë samitin e radhës.
Tema e diskutimit të samitit do të jetë “Evropa e re në një botë të re: unitet – bashkëpunim – veprim i përbashkët” dhe është strukturuar në 3 tryeza të rrumbullakëta me tematika të ndryshme.
