Ministri për Evropën dhe Punët e Jashtme, Igli Hasani, foli për votën e diasporës gjatë Samitit të V të Gruas Shqiptare të Diasporës.
Gjatë fjalës së tij ai e cilësoi votën e anëtarëve të diasporës, si një moment historik për demokracinë shqiptare.
Ndër të tjera ai theksoi se në zgjedhjet e ardhshme, vota e anëtarëve të Diasporës do të garantohet nga vendi i tyre pritës.
“Një lajm i mirë është që në zgjedhjet e pranverës së ardhshme, vota e anëtarëve të Diasporës do të garantohet nga vendi i tyre pritës, duke bërë të mundur një të drejtë kushtetuese, por dhe një kërkesë të vazhdueshme nga diaspora jonë. Vota e diasporës është një moment historik dhe një “borxh” që u kthehet shqiptarëve që jetojnë jashtë.
Tërheqja e anëtarëve të kualifikuar të diasporës është një nga sfidat më të rëndësishme për Ministrinë për Evropën dhe Punët e Jashtme dhe strukturat e saj. Me kënaqësi konstatoj se këtij regjistri i shtohet edhe ky rrjet i Gruas së Diasporës Shqiptare”, u shpreh ministri Hasani.
