Presidenti i Shteteve të Bashkuara të Amerikës, Donald Trump ka mbajtur një konferencë për shtyp pas përfundimit të samitit të NATO-s.
I shoqëruar në foltore nga Sekretari i Shtetit Marco Rubio dhe Sekretari i Mbrojtjes Pete Hegseth, Trump nisi fjalimin e tij duke falënderuar Holandën, mbretin dhe mbretëreshën e vendit për mikpritjen e tyre të ngrohtë.
Ndër të tjera, Trump foli për ‘nevojën’ e anëtarëve të tjerë të NATO-s për të marrë përsipër barrën e mbrojtjes evropiane. Trump iu referua angazhimit të NATO-s që anëtarët e saj të rrisin shpenzimet e mbrojtjes dhe sigurisë në 5%.
“Një fokus kryesor i diskutimeve deri më tani sot ka qenë nevoja që anëtarët e tjerë të NATO-s të marrin përsipër barrën e mbrojtjes së Evropës”, tha ai.
Trump mori përsipër meritat për marrëveshjen e re, duke thënë se ka pasur 700 miliardë dollarë (513.9 miliardë paund) më shumë shpenzime për mbrojtjen midis anëtarëve të NATO-s që kur ai filloi të bëjë thirrje për më shumë fonde në vitin 2017.
Presidenti amerikan u shpreh se njoftimi i ri për shpenzimet e mbrojtjes do të njihet si “Angazhimi i Hagës për mbrojtjen”.
Ai tha se kur kombet të arrijnë objektivin e shpenzimeve të mbrojtjes – 5% të PBB-së së tyre – kjo do të shtojë më shumë se 1 trilion dollarë në vit në mbrojtjen e përbashkët të aleatëve.
“Është një fitore e madhe për SHBA-në, Evropën dhe qytetërimin perëndimor”, theksoi Trump.
