Kryeministri Edi Rama foli nga Baku i Azerbajxhanit për ndryshimet klimatike dhe veprimet që po merren nga liderët botërorë.
Rama tha se përpos fjalimeve duhet vullnet i përbashkët politik në horizont për të shkuar përtej fjalëve dhe për t’u bashkuar për veprime kuptimplota.
Gjatë fjalës së tij, ai vuri në dukje deklaratën e djeshme të Sekretarit të Përgjithshëm të OKB-së, duke theksuar se ”emetimet e karbonit u rritën midis COP28 dhe COP29”.
“Vendosa të lë mënjanë fjalimin tim të mirëpërgatitur, sepse ndërkohë që prej ditës së djeshme, shihja ekranet e heshtura të televizorëve në sallën e pritjes së udhëheqësve ku organizatorët kishin menduar me kujdes të shtonin bimë të gjelbra mbi kolltukët e rehatshëm, njerëzit aty hanë, pinë, takohen dhe bëjnë foto së bashku.
Ndërsa pamje fjalimesh pa zë nga udhëheqësit vazhdojnë të shfaqen vazhdimisht në sfond.
Mua kjo më duket saktësisht si ajo që ndodh në botën reale çdo ditë. Jeta vazhdon, me zakonet e saj të vjetra dhe fjalimet tona, plot fjalë të mira për luftën kundër ndryshimeve klimatike, nuk ndryshojnë asgjë.
Çfarë do të thotë për të ardhmen e botës nëse ndotësit më të mëdhenj vazhdojnë si zakonisht?
Çfarë do të bëjmë ne në këtë mbledhje, pa pushim, nëse nuk ka vullnet të përbashkët politik në horizont për të shkuar përtej fjalëve dhe për t’u bashkuar për veprime kuptimplota?”, u shpreh Rama.
