Liderët e rajonit dhe udhëheqësit e BE-së, janë pritur me një shfaqje baleti në ambientet e Kryeministrisë para nisjes së punimeve të samitit.
Dy balerinë dhuruan një shfaqje të shkurtër për pjesëmarrësit që ndoqën nga afër pjesën e tyre. Kjo shfaqje u pasua me zbulimin e një pikture nga kryeministri Edi Rama.
Pas përfundimit të koreografisë, kryeministri Rama u shpreh se kërkonte që të ndërthurte artin e baletit me atë të pikturës.
Më pas ishte koreografi shqiptar me famë botërore, Angjelin Preljocaj, që bëri të mundur pjesën e baletit, i cili zbuloi se puna për mini-shfaqjen kishte nisur vetëm 24 orë më parë.
Ai tregoi se gjatë komunikimit me kryeministrin i ishte drejtuar duke thënë “Edi je i çmendur?!”, pasi sipas tij nuk mund të krijonte diçka të re me këtë limit kohor.
Megjithatë ai falënderoi kreun e qeverisë për mundësinë e dhënë, ndërsa pjesëmarrësit e Samitit vijuan me axhendën e tyre.
