Nacionalistët e Europës duket se po bashkojnë forcat përpara zgjedhjeve europiane, kjo pasi aleancës së nisur nga ministri i brendshëm Italian Matteo Salvini, i është bashkuar dhe kryetarja e frontit Nacional francez, Marine Le Pen.
Salvini falenderoi për këtë lëvizje Le Penin, e të njëjtën gjë bëri edhe Jörg Meuthen, kreu i partisë gjermane, Alternativa për Gjermaninë, i cili përshëndeti miqtë francezë në Parlamentin Europian.
Duke qenë se populistët e djathtë janë mjaft të përçarë në nivel europian, kreu i Lega Nord po bën përpjekje të vazhdueshme t’i bashkojë në një grup të ri në Parlamentin Europian pas zgjedhjeve të majit për ta forcuar kështu maksimalisht ndikimin e tyre. Aleanca e ngritur para pak ditësh në Romë nga Salvini dhe Meuthen, u quajt si “patriotike” dhe “liberale”, ndërsa pjesë e saj janë bërë edhe partia populiste austriake, FPÖ, partia “Finlandezët”, partia Daneze Popullore dhe populistë të djathtë nga Estonia./Opinion.al
