Ervin Salianji është paraqitur sot në Prokurorinë e Tiranës, si i pandehur që do të njihet me akuzën. Në një prononcim për mediat, Salianji tha se po akuzohet se ka denoncuar një trafikant.
“U mora si i pandehur sepse denoncova trafikantin. Nuk ka pasur hetim për të akuzuarit. Në rastin tim nuk ka asnjë problem për mua, se unë agjitator jam, por marrja në hetim e gazetarit është e pakuptueshme. Akuzohem për agjitacion, për bashkëpunim me gazetarin Jetmir Olldashi. Vendimi për marrjen të pandehur do rrëzohet në Gjykatë”, u shpreh Salianji.
Ervin Salianji është bërë protagonist në çështjen “Babale” ku akuzohet vëllai i ish-Ministrit të Brendshëm Fatmir Xhafaj, për trafikim të lëndëve narkotike. Nga selia blu, ai ka publikuar fillimisht audiopërgjimin mes Albert Veliut, i njohur si “Babalja”, dhe një personi që pretendohej të ishte Agron Xhafaj, vëllai i Fatmir Xhafajt.
Por më pas, rezultoi se e gjitha ishte inskenim dhe zërin e Agron Xhafajt e kishte bërë Fredi Alizoti. Në një video tjetër, Alizoti tha se Drejtori i Përgjithshëm i Policisë Ardi Veliu kishte ushtruar presion ndaj tij. Në gjithë këtë çështje, prokuroria ka hetuar edhe rolin e Ervin Salianjit, të cilin tashmë e akuzon për kallëzim të rremë./Opinion.al
