Ndalimi i grave në stadiume në Iran hyri në fuqi pas Revolucionit Islamik të vitit 1979, por pas vdekjes së Sahar Khodayari, Ministri i Sportit, Masoud Soltanifar deklaroi se janë bërë të gjitha përgatitjet e nevojshme që kjo gjë të ndryshojë.
Ai njoftoi se fillimisht gratë do të lejohen në ndeshjet ndërkombëtare që do të luajë kombëtarja iraniane e futbollit, ndërsa takimi i parë do të jetë ai i datës 10 tetor kur Irani do të luajë përballë Kamboxhias në një ndeshje të vlefshme për eliminatoret e Botërorit 2022 që do të zhvillohet në Katar.
Në impiantin ku do të luhet ndeshja janë bërë gati hyrjet, hapësirat dhe tualetet e ndara për burrat dhe gratë.
Kujtojmë se vdekja e Sahar Khodayari tronditi botën. Ajo u arrestua në Teheran pasi kishte shkuar të shihte një ndeshje futbolli pasi ishte një tifoze e zjarrtë e Esteghlal, ekipit më të rëndësishëm në Iran.
Edhe pse nuk lejohej të merrte pjesë brenda në stadium, guximi ishte më i madh se frika ndaj 30-vjeçarja, vendosi një paruke dhe veshi ngjyrat e ekipit të saj, hyri në stadium dhe mbështeti ekipin e zemrës. Por fatkeqësisht personali i sigurisë i stadiumit e zbuloi nga sinjalizimet e tifozëve që ishin ulur pranë saj.
Kështu që Sahar u arrestua, më 13 mars, vetëm pesë ditë pas ditës ndërkombëtare të gruas, dhe mbeti 3 ditë në qeli. Më pas u lirua në pritje të dënimit. Por incidenti, në një vend si Irani i kushtoi shumë ndaj vendosi të sakrifikohej duke u lyer me benzinë, dhe duke u vetëdjegur në 90% të trupit. Akti fatal e çoi në vdekje një javë më vonë.
Pas vdekjes së saj qytetarët organizuan tubime dhe protesta. Gjithashtu reaguan edhe disa nga lojtarët më të famshëm të Iranit, duke nisur nga Ali Karimi, kapiteni legjendar me 127 ndeshje në Kombëtare, që ftoi 4.5 milionë followers në Twitter të bojkotojnë stadiumet iraniane.
Mbase sakrificat dhe guximi i Sahar, ia vlejtën për diçka./Opinion.al
