“The Delaunay” është një nga restorantet e njohura në Londër, ku personazhe të famshëm si Patrick Stweart, Elton John, Piers Brosnan, Ian Mckellen, apo Rita Ora janë klientë të tij.
Ndërkohë, menaxhimi i përgjithshëm i këtij restoranti i është besuar një shqiptari. Saimir Kalziqi ishte vetëm 17 vjeç kur është larguar nga Shqipëria. Puna në fushën e restoracionit në fillimet e tij ishte një nevojë, sikurse shprehet, edhe për faktin që ishte nga të vetmit sektorë që jepte mundësinë e studimit gjatë ditës.
Por me sa duket, ajo që nisi si një nevojë do të kthehej në një pasion e më pas në një profesion për Saimirin, të cilit i është besuar menaxhimi i një restoranti që qarkullon miliona euro përgjatë një viti dhe që është i bazuar në Grand Restaurants of Viena. Edhe pse sot ka një pozicion që shumë do ta lakmonin, për Saimirin të qenit në këtë sektor, duket se ka kostot e veta.
“Disa nga vështirësitë janë të lidhura me balancimin e jetës personale dhe profesionale, përgjegjësinë për çdo aspekt te biznesit, si ai financiar dhe ai i cilësisë së ofertës, rekrutimi dhe menaxhimi i forcës punëtore. Një ndryshim që kam konstatuar në Britaninë e Madhe në raport me vendet mesdhetare, ka qene që pasioni, puna e mire dhe ambicia shpërblehen pertej faktit, që mund te jesh i huaj apo vendas. Puna dhe rezultatet janë ato që të hapin dyert drejt ngritjes në karrierë”, tregon Kalziqi.
Por a e ka menduar ndonjëherë rikthimin, apo ndarjen e përvojës së tij edhe në Shqipëri, nisur dhe nga fakti që vendlindjen e viziton të paktën dy herë në vit?
“Duke e pasur restoracionin pasion sjell edhe dëshirën për eksplorimin e kulturave dhe traditave në vede të ndryshme. Kalimi përtej kufijve të Britanisë së Madhe është një ambicje që kam. Së fundi duke parë edhe zhvillimin e turizmit në Shqipëri më duket, të paktën në Europë, si një nga projektet më interesante që çdo profesionist i kësaj fushe do të donte të ishte pjesë”, shprehet, ndërsa shton se në Londër po sheh interes të shtuar për Shqipërinë.
“Në 5 vjeçarin e fundit shikoj brande te ndryshme botërore në fushën e hotelerisë, ndërkohë që në Londer ka interes per Shqiperinë. Kudo ku te jesh flitet dhe bisedohet për të vizituar Shqipërinë në muajt e verës”, përfundon ai./Opinion.al