Ndeshja e djeshme mes Lacit e Kukësit u shoqërua me tenson në fushë por edhe një incident që ka ndodhur në tribunën VIP. “Panorama Sport” raporton se një tifoz kurbinas, i ndodhur në sektorin VIP, ka sulmuar presidentin e Kukësit, Safet Gjici. Fillimisht ai e ka ofenduar, teksa i ka kërkuar llogari për atë që ndodhi në ndeshjen e Kupës në Kukës. Gjici u përfshi në këtë debat të zjarrtë, ndërsa tifozi vijonte të ofendonte.
Megjithatë, ndërhyrja e menjëhershme e policisë ka evituar degradimin e situatës. Forcat e rendit shoqëruan menjëherë në komisariatin e Laçit tifozin që, pasi ofendoi presidentin e Kukësit, tentoi edhe ta godiste atë.
Një ngjarje e turpshme, për më tepër në sektorin VIP. Në atë moment nuk kanë qenë të pranishëm në tribunën VIP as drejtuesit e Laçit, të cilët me të mësuar ngjarjen kanë shfaqur indinjatën e tyre për këtë incident të pazakontë, duke u solidarizuar me kreun e klubit kuksian, Gjici. Nuk është hera e parë që në stadiumet tona ndodhin skena të tilla.
