Mallkimi” i mesfushorit të Arsenalit godet përsëri dhe këtë herë është aktori hollivudian, Alan Rikmen, ai që ka ndërruar jetë pas një goli të yllit uellsian.
Është cilësuar si një rastësi qesharake, madje vetë futbollistit nuk i vjen aspak mirë që emri i tij lidhet me një ngjarje të tillë. Por vdekja e aktorit britanik në moshën 69-vjeçare, pasi humbi betejën me kancerin, është rasti i 12-të që përsëritet pak orë pasi Ramsej shënon për “topçinjtë”.
Lista e gjatë
Ajo nis me vrasjen e Osama Bin Ladenit më 1 maj 2011, kur Ramsej shënonte ndaj Mançester Junajtid. Rasti i dytë përsëritet më 2 tetor të të njëjtit vit: pas golit ndaj Totenhemit ndërroi jetë themeluesi i “Apple”, Stiv Xhobs.
Brenda të njëjtit muaj, goli i Ramsejt ndaj Marsejës do të “marrë në qafë” një tjetër emër të njohur, ish-presidentin e Libisë, Muamar al-Gedafin. Më 11 shkurt 2012, 25-vjeçari gjen rrugën e rrjetës ndaj Sandërlendit dhe brenda së njëjtës ditë mbyll sytë edhe këngëtarja Uitni Hjuston.
Talenti i Vengerit do të pushojë një vit, por kur rikthehet t’i shënojë Koresë së Jugut më 21 mars 2013, këtë herë vdes novelisti nigerian, Çinua Açebe dhe pianisti kuban Bebo Valdez. Më 16 maj 2013, pas golit ndaj Uiganit, ndërron jetë gjenerali argjentinas Horge Rafael Videla.
Një gol tjetër ndaj Marejës më 18 shtator 2013, këtë herë merr me vete boksierin Ken Norton.
Edhe kur aktori Pol Uoker mbeti viktimë e një aksidenti me makinën e tij 30 nëntorin e 2013-ës, Ramsej e dërgoi sërish topin në rrjetën e Kardifit në të njëjtën ditë.
Mallkimi i radhës do të marrë një tjetër aktor, këtë herë Robin Uilliamsin, trupi i të cilit u gjet i pajetë më 11 gusht 2014, një ditë pasi Ramsej kishte tundur rrjetën e Mançester Sitit.
Rastet e fundit janë ato të vdekjes së këngëtarit të famshëm Dejvid Boui (gol Sandërlendit më 9 janar).
Katër ditë më vonë Ramsej shënoi golin e parë ndaj Liverpulit në “Anfield” dhe mëngjesin e djeshëm ndërroi jetë në Londër edhe aktori Alan Rikmen.
Gjatë një interviste për “Bleacher Report” në qershor 2015, intervistuesi Aleks Dimond publikoi një dialog të fshirë të intervistës në të cilën Ramsej thotë se nuk ndihet aspak mirë që emri i tij lidhet me vdekjet e njerëzve të famshëm.
Po pyes veten nëse të kujtohet se pak vite më parë sa herë ti shënoje vdiste një person i famshëm dhe kjo vazhdoi të bëhej lajm për një kohë të gjatë. Të kujtohet?
Ma kanë thënë disa njerëz, por atëherë nuk shënoja shumë. Tani po shënoj dhe falë Zotit asnjë nuk ka vdekur.
Pra e ke kaluar atë moment?
Po, ishte një spekulim idiot.
Nuk t’u duk aspak një rastësi zbavitëse?
Jo, nuk e shoh aspak të tillë.
