Kreu i komisionit të inteligjencës në parlamentin gjerman Konstantin von Notz hedh dyshime për ndërhyrje të Rusisë dhe faktorëve të tjerë nga jashtë në zgjedhjet parlamentare të 23 shkurtit.
Në një intervistë për të përditshmen prestigjioze Financial Times, deputeti gjerman flet për një manipulim të suksesshëm dhe të qartë të zgjedhjeve, ku për të parën herë që pas luftës së dytë botërore, radikalët e djathtë si ata të Alternativës për Gjermaninë u renditën forcë e dytë.
“Mendoj se mund të thuhet me siguri që ka patur ndikim të paligjshëm në procesin e vendimmarrjes në zgjedhje”, tha Van Notz.
Von Notz nuk mund ta thotë me saktësi se sa vota u manipuluan nga rusët.
Megjithatë, edhe krerët të strukturave euroatlantike kanë paralajmëruar më herët rrezikun e ndërhyrjes së Rusisë në zgjedhjet e vendeve anëtare të Bashkimit Europian, duke favorizuar politikanë me qasje miqësore ndaj Moskës për të ndikuar në zbutjen e politikave të vendeve të tyre, të ashpërsuara pas nisjes së luftës në Ukrainë.
Pasojat më të rënda të ndërhyrjes ruse u panë në zgjedhjet presidenciale të nëntorit në Rumani, që u anuluan nga Gjykata e Lartë pasi zbulimi vendas vërtetoi ndikimin e fshehtë të Moskës që radikali i djathtë Kalin Georgescu të kryesonte papritur në raundin e parë.
Tv Klan
