Shërbimi Federal i Sigurisë së Rusisë (FSB) ka sekuestruar një ngarkesë prej 670 kg kokainë, të ardhur nga Amerika Latine që do të kontrabandohej në BE, për t’u vënë në dispozicion të grupeve europiane të trafikut të drogës.
FSB sqaroi se çmimi me shumicë i dërgesës në “tregun e zi” rus arrin në rreth 2.7 milionë dollarë. Megjithatë, vlerësohet se kokaina mund të kapë një vlerë rruge deri në 72 milionë dollarë.
“Një tjetër përpjekje e një grupi kriminal ndërkombëtar për të përdorur territorin e Rusisë për transit dhe shpërndarje të drogës është penguar”, thuhet në deklaratën e FSB.
Sipas FSB-së, dy burra nga rajonet kufitare të Rusisë u arrestuan në Moskë ku iu gjet edhe ngarkesa e drogës. Ata dyshohet se kishin ardhur në kryeqytet për të marrë ngarkesën dhe për ta dërguar në një vend nga ku do të futej kontrabandë në BE.
Autorët përdorën një makinë të marrë me qira, letërnjoftime dhe leje drejtimi false. Videoja e publikuar nga FSB tregonte një fuoristradë të mbushur me çanta dhe kutit e kokainës. Madje disa rrëzohen në asfalt teksa agjentët hapin derën e pasme të mjetit.
Të dyshuarit pretenduan se nuk kishin dijeni për lëndën që përmbanin pakot. “Na u ofrua një shans për të fituar para dhe për të lëvizur disa kuti“, tha njëri prej tyre.
FBS u kujtoi të dyshuarve se trafikimi i drogës, veçanërisht në përmasa të mëdha, është një krim i rëndë në Rusi, i cili mund të rezultojë me një dënim deri në 20 vjet burg apo edhe me burgim të përjetshëm.
