Rudina Hajdari, e cila nuk pranoi të dorëzonte mandatin, ka folur sot për herë të parë në Parlament. Në fjalën e saj, ajo është shprehur kundër elitës politike në vend, që po e mban popullin peng prej tre dekadash. Hajdari foli si kundër opozitës, ashtu edhe mazhorancës, duke thënë se dorëzimi në bllok i mandateve ishte një mënyrë për të përshpejtuar kalimin e pushtetit.
“Dorëzimi i mandateve në bllok, për të shpejtuar kalimin e pushtetit, është përshkallëzim i sjelljes politike të këtyre 28 viteve. Ripërsëritja e krizave të brendshme, jo vetëm ngadalëson procesin e integrimit, por na ekspozon në mënyrë të rrezikshme ndaj influencave të tjera”, është shprehur ndër të tjera ajo.
Hajdari foli edhe për protestën e studentëve, duke thënë se politika e dëmtoi me ndërhyrjet e saj.
“Rinia tregoi vullnetin popullor kundër sistemit politik të instaluar prej 28 vitesh, sistem i cili nuk është shkëputur as sot e kësaj dite nga regjimi i kaluar. Protesta e studentëve, rrezikoi elitën politike, ndaj të gjitha palët bënë ç’është e mundur që ta kapnin. Elita doli zbuluar në qëllimet e saj. Marreshjet prapa shpinës së shqiptarëve, bëjnë që pas tre dekadash të thërrasim sërish ‘E duam Shqipërinë si gjithë Europa’”, tha ajo.
Rudina Hajdari deklaroi se në muajt në vijim, do të paraqesë një sërë propozimesh për ndryshimin e gjendjes politike, ekonomike dhe sociale në Shqipëri.
“Kemi një qeveri që nuk pranon me arrogancë gjendjen e rrënuar të shqiptarëve, vrasjet në qendër të qyteteve, largimi në masë, papunësia janë epidemi për gjithë vendin. Kjo qeveri e dalë nga një fitore gjysmake, e dalë nga 23% e shqiptarëve në tërësi, s’do t’ia dijë për asgjë. Unë jam përgjegjëse para zgjedhësve të mi. Para atyre që më kanë votuar, por edhe atyre që nuk më kanë votuar. Asnjë nuk mund ta gjykojë vendimin tim, ashtu si historia. Unë do bëj hapa si sigurt, larg politikës së vjetër. Në ditët dhe muajt që do të vijnë, do vij me propozime konkrete për ta kthyer vendin në normalitet. Arsyeja pse erdha dhe po qëndron në politikë, është se dua të sjell një frymë të re politike”, është shprehur Rudina Hajdari./Opinion.al
