TIRANE- Policia Rrugore në kryeqytet ka gjobitur një numër të madh drejtuesish mjetesh. Janë vendosur 170 gjoba në fundjavë, bën të ditur policia.
“Policia Rrugore e mbështetur nga Patrullat e Përgjithshme dhe forcat “Shqiponja”, gjatë fundjavës që kaloi kanë intensifikuar punën për ndëshkimin e shkelësve të Kodit Rrugor”, thuhet në njoftim.
Si rezultat, 15 drejtues mjeti janë arrestuar në gjendje të dehur, ndërsa 25 të tjerëve iu pezullua leja e drejtimit për konsum alkooli. Gjithashtu, 45 drejtuesve të mjeteve u është pezulluar leja e drejtimit pasi kanë tejkaluar normat e shpejtësisë, matur me radar. 64 drejtues janë ndëshkuar pasi janë konstatuar me mjete me xhama të riveshur, si dhe 27 drejtues mjetesh janë ndëshkuar pasi kanë qarkulluar në sensin e kundërt të lëvizjes.
Aksioni i policisë rrugore për vendosjen e gjobave vazhdon, kështu që drejtuesit e mjeteve duhet të tregojnë kujdes.
