Kryetari i bashkisë së Tiranës Erion Veliaj i është rikthyer sërish argumentit të lidhur me emërtimet e rrugëve në kryeqytet, pas debatit të krijuar mbi emrin e rrugës “4 Dëshmorët”.
Ndërsa inspektoi punimet në kantierin për ndërtimin e shkollës së 9-vjeçare “Xhezmi Delli”, Veliaj tha se emrat e dëshmorëve nuk do të hiqen, ndërsa akuzat e opozitës i konsideroi si sport politik.
“Xhezmi Delli është një emër dëshmori, Hero i Popullit, dhe për të gjithë ata që sa herë vjen fushata, sa herë fillojnë këto muhabetet politike, kujtohen se duhet të heqin emrat e dëshmorëve. Emri i Xhezmi Dellit nuk do të hiqet, emri “Dëshmorët e 4 Shkurtit” nuk do të hiqet, Emin Duraku nuk do të hiqet, Asim Vokshi nuk do të hiqet, as emri i Avni Rustemit e kështu me radhë. Ky është një vend që vërtet politikën e ka sport, por çdo gjë me masë. Edhe në një sport, edhe në një ndeshje, edhe fanatiku më i madh, nuk e dhunon tjetrin e palës kundërshtare”, sqaroi Veliaj.
Duke ju rikthyer çështjes së rrugës “Ibrahim Rugova”, Veliaj tha se Tirana është një qytet që i ka respektuar të gjithë dhe se kjo rrugë, jo vetëm që nuk është shkurtuar, por është zgjatur deri te Diga e Liqenit.
“Më vjen mirë që u sqarua edhe çështja e rr. “Ibrahim Rugova”, e cila jo vetëm nuk është shkurtuar, por është zgjatur. Shkon përtej ish-Gardës ku bashkohet me “Rrugën e Kosovarëve” te Diga e Liqenit. Unë besoj se një qytet i mirë, ka vend për të respektuar të gjithë. Siç kemi respektuar ish-shkollën time, “Kosova”, “Rrugën e Kosovarëve”, sheshin “Adem Jashari”, siç shpallën Qytetar Nderi Adem Demaçin përpara se të largohej nga jeta, ashtu do të nderojmë edhe me një shtatore të Ibrahim Rugovës në Tiranë, aty ku rruga që mban emrin e tij zgjatet dhe bashkohet me Parkun e Liqenit. Pra, këtu po të kesh zemrën e madhe dhe po të kesh një mendje të hapur, ke mundësi t’i respektosh të gjithë. Po të kërkosh një sebep për përçarje, për sherr, sigurisht edhe këtë e gjen”, përfundoi Veliaj./Opinion.al
