Dëshmia e penalitetit për ish-kryebashkiakun e Kavajës, Elvis (Ervin) Rroshi, lëshuar nga Ministria e Drejtësisë në Itali, tregon gjithashtu se ai është dënuar edhe për “dhunë dhe përdhunim në grup”.
Vendimi është dhënë në 13 nëntor 1992 nga një gjykatë e shkallës së parë.
Asokohe Rroshi ishte vetëm 16 vjeç.
Dënimi parashikuar ishte 1 vit e 4 muaj burg. Por ndërkohë në reagimin e sotëm ai jep një tjetër version. Ai thotë se ishte shoqëruar në polici nga një kamp refugjatësh “pas një sherri të madh”. Ja cfarë shkruan Rroshi:
“Po sot duhet te ndaj publikisht me keqardhjen më të madhe, një informacion që më ka kapur në befasi të plotë dhe ndryshon gjithçka. Avokatët e mi më kanë informuar, se papritur dhe pa kujtuar rezultojë të jem dënuar si minoren! I bie të jem dënuar pa dijeninë time në Itali në kohën kur isha ende në kampin e refugjatëve. Jam akoma i shokuar nga ky njoftim dhe as unë vetë nuk di çfarë të shpjegoj më shumë. E vetmja gjë që mund të kujtoj është se na patën shoqëruar njëherë në polici në tufë nga kampi pas një sherri të madh. Mua me ndanë veç se isha minoren dhe kur më morën në pyetje nuk dija akoma as pesë fjalë italisht. Por as kam qenë ndonjëherë në gjyq as kam bërë ndonjë ditë burg për këtë dënim të dhënë nga një gjykatë minorenesh, që rezulton në kartelën time penale kur sapo kisha mbushur 16 vjeç. Kjo është e vërteta tronditëse që sapo kam marrë dijeni. Por s’ka pike rëndësie e vërteta që tregoj unë sot. Faktikisht pa e ditur këtë dënim s’kam pasur si ta deklaroj. Ndërsa pasi jam venë në dijeni, kjo për mua është bërë një çështje që i përket drejtësisë jo politikës”, shkruan Rroshi.
Në dëshminë e tij të penalitetit shkruhet “violenza karnale”, që do të thotë se ish-kryebashkiaku i Kavajës është dënuar për përdhunim.
