Duket se hapja dhe aktiviteti i turizimit këtë vit do të reflektojë një rritje të çmimeve për qytetarët që duan të pushojnë. Këtë fakt e kanë pranuar në emisionin “Opinion”, kryetarja e Bashkisë së Shkodrës, Voltana Ademi dhe Kryrtari i Bashkisë së Vlorës, Dritan Leli.
“Një reflektim do ta ketë, sepse oferta dhe kërkesa janë ato që rregullojnë marrëdhënien. Por ajo që dua të them, nga biseda me operatorët është që optimizmi është shumë më evident se sa pesimizmi. Ajo që është e veçantë e Shqipërisë, është që ka një mekanizëm të vogël të industrisë turistike që mund të vihet në punë shumë me kollaj se sa mekanizmat e industrive me hotele të mëdha”, tha Kryebashkiaku i Vlorës, Leli.
Ndërkohë Kryetarja e Bashkisë së Shkodrës, Voltana Ademi tha se kjo rritje e çmimeve parashikohet të jetë e lidhur me kosto shtesë që mund të nevojiten për pjesën e sigurisë.
“Nëse parashikoj që kemi një ndryshim portokolli, do të rriten kostot që lidhen me pjesën e sigurisë. Numri i ulët i turistëve dhe situata ekonomike e rëndë do të ndikojë ndjeshëm në atë që quhet çmimi apo oferta turistike që Shqipëria ka. Sidomos Edhe pjesa që lidhet me kostot për mbrojtjen, sigurinë u;plet efiçenca e shfrytëzimit të hapësirave, gjithçka. Kjo padyshim do të rrisë kostot”, tha Ademi./Opinion.al
