Ekonomia shqiptare ka performuar me një rritje dyfish më të vogël nga parashikimi i qeverisë për tremujorin e dytë të vitit. Vetëm 2.3% rritje, pothuajse e njëjta normë me tremujorin e parë, është pothuajse sa gjysma e objektivit 4% të qeverisë.
Situata është përkeqësuar në energjetikë, industri, ndërtim dhe në pjesën e shërbimeve që lidhen me artin dhe argëtimin. Ndërkaq rritja në sektorët e tjerë është thuajse e papërfillshme.
“Kontributin kryesor në këtë rritje e kanë dhënë degët; tregti, transport, akomodim dhe shërbim ushqimor me 0.71%. Administrata publike, arsimi dhe shëndetësia 0.2%, aktiviteti i bujqësisë, pyjeve dhe peshkimit me 0.41%, aktivitete të pasurive të paluajtshme me 0.35%, aktivitetet financiare dhe të sigurimit me 0.3%”, shpjegoi Elsa Dhuli, Drejtore e Përgjithshme e komanduar e INSTAT.
Ekonomia nuk ka performuar as në trendet e parashikuara nga Banka Botërore dhe Fondi Monetar Ndërkombëtar të cilat flisnin për një ecuri të ngadaltë nga 3.5 deri në 3.6%.
Ulja e konsumit, rënia e besimit në ekonomi si dhe kriza politike në vend janë disa nga faktorët kryesorë që penalizojnë ekonominë Pesimiste ka qenë edhe Banka e Shqipërisë me një parashikim rritje prej 3.8% përballë objektivit prej 4.3% të qeverisë, e cila vazhdon ta ruajë atë, të paktën për momentin. /Opinion.al
