Opozita në Këshillin Bashkiak të Tiranës, ka reaguar pas takimit që Kryetari i Bashkisë Erion Veliaj ka pasur në mbrëmje vonë me përfaqësues të biznesit, të cilët kundërshtojnë fort rritjen e taksave. Një një deklaratë për shtyp, opozita në Këshill thotë se: “Sot pas shumë denoncimeve të këshilltarëve të Partisë Demokratike dhe pas protestës këmbëngulëse të biznesit të vogël të Tiranes , Erion Veliaj u detyrua të anonconte tërheqjen nga Vendimi i tij per taksa dhe tarifa luksi në Kryeqytetin më të varfër të Europës. “
Më tej në deklaratë thuhet se: “Kryetari i Bashkisë së Tiranës ishte i detyruar të anullonte vendimin dhe të rishikonte taksat vendore, ne duhet ta ndalim kur të miratohen të rejat në Këshill Bashkiak”.
“Pune ditësh akti per taksat dhe tarifat e shumëfishuara të Bashkisë së Tiranës do të anullohet nga Gjykata Administrative. Në mbledhjen e 30 dhjetorit Këshilltarët e PD-së në Bashki anoncuan se Vendimi i Këshillit Bashkiak për “Sistemin e Taksave dhe Tarifave në Qytetin e Tiranës” nuk mund të kalonte në atë mbledhje për shkak se Projektligji për “Sistemin e Taksave Vendore” jo vetëm nuk ishte dekretuar nga Presidenti i Republikës, por as ishte botuar në fletore zyrtare dhe për këtë arsye ai nuk ishte bërë ende ligj si e vetmja mënyrë për ti hapur rrugë miratimit të Vendimit të Këshillit Bashkiak për taksat dhe tarifat e qytetit. Paaftësia ekstreme e stafit militant të Erion Veliajt dhe arroganca e tij famoze detyroi Partinë Demokratike që në daten 3 janar ta çonte këtë çështje në Gjykatë Administrative, me kërkesë anullimin e vendimit të paligjshëm dhe abuziv të taksave të Kryeqytetit.
Ditën e hënë në orën 8 e 30 zhvillohet seanca e radhës në Gjykatën Administrative të Apelit, e cila me siguri do të anullojë Vendimin e taksave të çmendura të Veliajt.
Për këtë arsye Veliaj do të jetë i detyruar si fillim të rikthejë te bizneset të gjitha paratë e arkëtuara në mënyrë të paligjshme deri më tash dhe të ribëjë një akt tjetër për taksat dhe tarifat vendore. “ shkruhet në deklaratën e opozitës në Këshill Bashkiak.
