Kryeministri britanik, Boris Johnson njoftoi këtë të hënë izolimin total të Anglisë. Johnson ka thënë se të gjithë britanikët duhet të punojnë nga shtëpia dhe duhet të dalin vetëm për nevoja jetike, të veçanta.
Të gjithë nxënësit dhe studentët do të zhvillojnë mësim në distancë, ndërsa provimet e fundvitit nuk do të zhvillohen këtë verë si normalisht. Johnson deklaroi që Anglia mund të “largohet” nga bllokimi në mes të shkurt.
Po ashtu ai paralajmëron se javët në vijim do jenë më të vështirat, por shprehet optimist pasi me vaksinën tashmë po i vjen fundi pandemisë.
“Por me të vërtetë besoj se po hyjmë në fazën e fundit të luftës, sepse me çdo goditje që na futet në krahë, ne jemi duke anuar shanset kundër COVID në favor të popullit britanik. Falë mrekullisë së shkencës, jo vetëm fund i dukshëm, por ne e dimë saktësisht se si do të arrijmë atje”- tha Johnson.
Më herët, krerët e sistemit shëndetësor të vendit ( NHS ) paralajmëruan se spitalet në shumë zona nuk do të ishin në gjendje të përballojnë rritjen e vazhdueshme të rasteve dhe bënë thirrje për një rritje të nivelit të gatishmërisë në nivelin më të lartë, Nivelin 5.
Ndërkohë, vaksina e koronavirusit e sapo aprovuar e prodhuar nga Universiteti i Oksfordit dhe AstraZeneca po shpërndahet në të gjithë Mbretërinë e Bashkuar./Opinion.al
