Kryeministri Edi Rama ka reaguar sërish lidhur me pagën minimale duke theksuar se përllogaritja e saj nuk bëhet sipas asaj çfarë dëshirojmë ne, por bazuar në produktivitetin ekonomik dhe konkurueshmërinë.
Përmes një postimi në llogarinë e tij zyrtare në Facebook, Rama thekson se çdo rritje e saj artificialisht shkakton pasoja për vendin në aspektin ekonomik.
Më tej, kreu i qeverisë nënvizon se me rritjen e fundit të pagës minimale të bërë nga qeveria, Shqipëria ngjitet në vendin e tretë duke barazuar Maqedoninë e Veriut dhe lënë pas Bonsjë-Hercegovinën dhe Kosovën. Ai premton se në vazhdim do të realizojnë edhe dy rritje të tjera brenda këtij mandate, me synimin që niveli minimal i pagave në vend të shkojë 48 mijë lekë, nga 38 që ka qenë objektivi i tyre elektoral.
“ E kemi nisur nga vendi i fundit në rajon për nivelin e pagës minimale, ndërsa me rritjen e fundit ngjitemi në vendin e tretë baraz me Maqedoninë e Veriut, duke lënë pas Bosnjë-Hercegovinën dhe Kosovën.
Do të bëjmë edhe dy rritje të tjera për ta mbyllur këtë mandat me pagë minimale 45 mijë lek, nga 38 mijë që ishte objektivi ynë elektoral, por që s’merrte parasysh inflacionin e luftës së Putinit për të gjunjëzuar ekonomikisht mbarë Europën!
Ndërkohë kjo rritje përtej parashikimeve e pagës minimale imponon edhe rritjen e pagës mesatare për të riekuilibruar piramidën e pagave, çka do të bëhet njëkohësisht në muajin prill
*Disa komentojnë se paga minimale duhet të bëhet 70 apo 80 mijë lekë, por përllogaritja e pagës minimale bazohet në produktivitetin ekonomik dhe konkurueshmërinë, jo në dëshirat tona (asnjë vend i rajonit nuk e ka një minimum të tillë). Çdo rritje artificiale e saj sjell me shpejtësi pasoja destabilizuese për ekonominë, punësimin, financat e vendit” – shkruan Rama.
