Tendenca e largimit të shqiptarëve të cilët janë të specializuar në një profesion është në rritje dhe kjo gjë po dëmton industrinë vendase. Statistikat tregojnë se në disa sektorë si shëndetësi, shërbime apo edhe fasonë, njerëzit janë më të prirur të emigrojnë. Kushtet e punës, pagat e ulëta dhe mungesa e perspektivës janë disa nga faktorët kryesorë të këtij fenomeni. Të qenit të specializuar në një fushë të caktuar mundëson gjetjen më lehtë të një pune në Perëndim ku tregu ka më shumë kërkesë dhe rrogat janë më të larta.
Sipas sondazheve të fundit, ku janë pyetur punonjës në call center, të cilët përgjithësisht janë me shkollim të lartë dhe zotërojnë një gjuhë të huaj, 85% e tyre pohojnë se duan të largohen. E njejta gjë vlen për 75% të infermierëve, 56% e punonjësve në sektorin e ndërtimit, 53% e rrobaqepësve dhe 38% e atyre që punojnë në fabrikat e këpucëve.
Mungesa e forcës punëtore në sektorët e industrisë fasone, bujqësi, turizëm si dhe shëndetësi kanë bërë që biznesi të ndjejë i pari vështirësinë. Mungesa e punëtorëve të specializuar ka sjellë më shumë problematika për qytete si Shkodër, Durrës, Korçë, Librazhd apo Pukë. Mungesa e specialistëve shëndetësorë në vitet e fundit ka prekur edhe spitalet rajonale dhe qendrat universitare, për shkak të nivelit të lartë të emigracionit. /Opinion.al
