Autoriteti i Konkurrencës ka njoftuar se ka nisur hetimet në tregun e shumicës për shitjen e materialeve para-mjekësore.
Sipas vendimit të ditës së martë të Komisionit të Konkurrencës, verifikimet në terren kanë treguar se ka një mungesë të materialeve në nivelin e tregëtisë me pakicë dhe ka një rritje të pajustifikueshme të cmimeve në të gjitha nivelet e tregëtimit të këtyre materialeve.
Bëhet fjalë për dezifektantët e duarve, maskat dhe alkoolin, cmimet e të cilave pësuan një rritje të menjëherëshme pas situatës së krijuar nga përhapja e koronavirusit.
Këto rritje abuzive të cmimeve u denoncuan fillimisht nga qytetarët dhe më pas në media.
Sipas Autoritetit të Konkurrencës ka shenja të arsyeshme të një sjelljeje të mundshme antikonkurruese të ndërmarrjeve që operojnë në të gjitha nivelet e tregëtimit të këtyre materialeve.
Kështu që ata kanë vendosur të hapin një hetim paraprak në tregun e shitjes me shumicë dhe me pakicë të këtyre materialeve.
Hetimi do të përfshijë periudhën kohore, 1 janar – 31 maj 2020 dhe raporti paraprak i tij do të dorëzohet jo më vonë se 2 muaj nga nisja e hetimit. /Opionin.al
