Partia Demokratike ka reaguar pas lajmit të publikuar në media për rritjen e çmimeve për shërbimet dentare. Deputeti Bardh Spahia nga selia e demokratëve tha se qeveria është përgjegjëse edhe pse vendimi është marrë nga Urdhëri i Stomatologëve.
“Me një vendim të paprecedentë, të paligjshëm, abuziv, presidenti i Urdhrit të Stomatologut, Nikollë Deda,kandidati për deputet i Edi Ramës në Pukë,urdhëron dentistët të rrisin gati dyfish çmimet për 13 shërbime. Kandidati për deputet i Edi Ramës që drejton urdhrin e stomatologëve është në shkelje të plotë të ligjit për Urdhrin e Stomatologut”, tha Spahia.
Deputeti demokrat kërkoi që Nikollë Deda të mbajë përgjegjësi ligjore pasi ka nxitur në mënyrë të paligjshme vendosjen në treg të çmimit monopol. Po sipas Spahisë përgjegjëse është dhe qeveria pasi ka heshtur për këtë urdhër të paligjshëm. “Ministria e Financave është informuar zyrtarisht që lista e çmimeve të reja të paligjshme të zbatohet në kasat fiskale, por nuk ka bërë asgjë për ta kundërshtuar. Po kështu Ministrja e Shëndetesisë, e cila është e zënë me propagadën e shëmtuar për të paraqitur spitalet e Shqipërisë si spitalet e Zvicrës, ka mbyllur një sy për urdhrin e paligjshëm që bie në kurrizin e çdo shqiptari”, theksoi ai.
/Ri-De
