Flota e mjeteve elektrike në qarkullim vijon tendencën e saj rritëse. Sipas statistikave të drejtorisë së përgjithshme të transportit rrugor, për tremujorin e parë të vitit 2025 janë regjistruar 980 mjete plotësisht elektrike ose 55% më shumë krahasuar me të njëjtën periudhë të një viti më parë.
“15% më shumë mjete se 2024. Këto mjete kanë pasur vazhdimisht rritje të regjistrimeve duke marrë përbazë incentive apo lehtësira siç kanë qenë tarifat e rregjistrimit të mjeteve”, thotë drejtori i regjistrimit të mjeteve në DPSHTRR, Arben Progni.
Sipas DPSHTRR-së, 33% e mjeteve miqësore me ambientin janë me 0 Km të regjistruara dhe 72,1% e autoveturave të regjistruara gjatë Janar-Mars 2025 janë Euro 5 e sipër.“Nga të gjithë mjetet e regjistruara me 0 Km kemi rreth 33% të tyre, 28% më shumë se viti 2024. Përveç aspektit kryesor që është pjesa ekologjike në aspektin fiskal këto mjete nuk paguajnë taksën vjetore të mjeteve të përdorura”, shprehet Progni.
Po kështu, sipas të dhënave nga DPSHTRR, 72.1% e autoveturave të regjistruara gjatë Janar-Mars 2025 janë Euro 5 e sipër apo më të reja, duke përmirësuar ndjeshëm cilësinë e flotës rrugore në vend./ Tv Klan
