Rreth 2 milionë shtetas e kanë vizituar Shqipërinë përgjatë muajit Qershor të këtij viti. Të dhënat nga Instituti i Statistikave bëjnë me dije se ky tregues rezulton me një rritje prej 21.5% krahasuar me të njëjtën periudhë të një viti më parë, ndërkohë që nga kjo shifër 1.3 milionë e totalit janë shtetas të huaj.
Rritje gjithashtu në masën 20% ka pësuar edhe numri i qytetarëve që kanë zgjedhur të dalin nga territori shqiptar përgjatë kësaj periudhe, të cilët tejkalojnë shifrën e 1.7 mln qytetarëve. Shtetasit shqiptarë përbëjnë 642.471 qytetarë, teksa pjesa tjetër janë shtetas të huaj.
Sa i takon gjeografisë së shtetasve të huaj që kanë hyrë në Shqipëri, dominon Evropa me 1.174.197 shtetas, pasuar nga Amerika, Azia Lindore dhe Paqësori, përkatësisht me 41.921 dhe 11.103 shtetas. Ata kanë deklaruar si arsye kryesore për të vizituar vendin tonë çështjet e biznesit, pushimet e vizitat tek të afërmit./ Tv Klan
