Ministri i ri i energjisë i Arabisë Saudite u zotua se politika e Organizatës së Vendeve Eksportuese të Naftës (OPEC) do të vazhdojë, duke nënkuptuar kështu shkurtimin e prodhimit për të mbështetur çmimet. Duke folur gjatë Kongresit Botëror të Energjisë në Abu Dhabi, ministri tha se marrëveshja e prodhimit e grupit të quajtur OPEC+ ka tendencë që të “qëndrojë për një kohë të gjatë”.
Princi Abdulaziz bin Salman është djali i mbretit të Arabisë Saudite. Ai u zotua se nuk do të ketë “ndryshime radikale” në marrëveshjen e OPEC-ut për të shkurtuar prodhimin.
Kjo deklaratë e tij ka bërë që çmimi i naftës të shënojë rritje.
Çmimi u rrit me 1.52% duke e çuar çmimin për fuçi në 62.67 dollarë. Të martën në mëngjes ky çmim u rrit edhe më shumë duke arritur 62.84 dollarë për fuçi.
Abdulaziz u emërua javën e shkuar ministër i ri i Energjisë në Arabinë Saudite, duke zëvendësuar ish-ministrin Khalid al-Falih, i cili kryesoi marrëveshjen për shkurtimin e prodhimit mes vendeve të OPEC-ut dhe atyre jashtë OPEC-ut.
Vendet prodhuese të naftës OPEC+, ku bën pjesë edhe Rusia, në fillim të korrikut u pajtuan që të ulin sasinë e prodhimit të përgjithshëm për 1.2 milionë fuqi në ditë deri në fund të marsit të vitit 2020. /Opinion.al
