Kompanive të cilat tregtojnë lëndë hidrokarbure me shumicë do t’u vendoset një tjetër tarifë. Nisma ligjore nga ministrja Belinda Balluku është dërguar për konsultim në grupet e interesit. Kjo nismë parashikon krijimin dhe menaxhimin e rezervave të sigurisë së naftës dhe nënprodukteve të saj.
Kompanitë e karburanteve janë të detyruara të mbajnë një rezervë nafte prej 90 ditësh, mesatare të shitjeve vjetore. Ky rregull nuk është respektuar. Në 2018-n rezerva duhet të kishte 218 mijë ton lëndë hidrokarbure.
Për këtë arsye, qeveria do të ngrejë një agjenci shtetërore, që do të krijojë dhe menaxhojë rezervën. Për të kryer të gjithë procesin, projektligji detyron kompanitë që të paguajnë një tarifë në momentin që paguajnë akcizën e naftës në doganë, e cila do t’i kalojë agjencisë që do të krijojë menaxhimin e rezervës energjetike të kësaj lënde.
Vlera e tarifës ende nuk është vendosur, por do të jetë Ministri përgjegjës që do të përcaktojë nivelin e saj.
E kontaktuar nga Televizioni Klan, Shoqata e Hidrokarbureve tha se pret një takim nga përfaqësuesit e Ministrisë për të bërë prezantimin e nismës. Gjithashtu, çdo tarifë shtesë për naftën do të reflektohet te çmimi që u shitet konsumatorëve, u shpreh shoqata.
Mbajtja e rezervës së naftës është një detyrim që rrjedh për Shqipërinë nga direktiva 119 e vitit 2009 e Parlamentit Europian, e cila lidhet me sigurinë kombëtare të një vendi në rast se sasia e naftës duhet në kohë lufte, apo krize prodhimi të saj./E.L
