Rregullat e reja të qarkullimit rrugor do të zbatohen nis nga datë 10 shtator. Ato ishin parashikuar për sot, siç parashikon Kodi i ri Rrugor, por policia thotë se do të vazhdojmë me sensibilizim edhe për 5 ditë të tjera.
Sipas Kodit të ri, vendosja e rripit të sigurimit për pasagjerët është e detyrueshme. Për shkelësit, gjoba e parashikuar shkon nga 5 mijëderi në 15 mijë lekë (të reja).
“Për të gjitha automjetet e prodhuara pas vitit 1990, janë të detyruar si pasagjerët para edhe ata në pjesën e prapme të mjetit të mbajnë rripin e sigurimit dhe sistemet e fiksimit”, deklaron Taulant Gjoka, shef i Trafikut në Tiranë.
Në rast se ky detyrim i parashikuar në Kodin Rrugor nuk përmbushet pas 10 shtatorit, drejtuesit e mjeteve do të ndeshkohen me gjobë.
Me hyrjen në fuqi të ndryshimeve të reja në Kodin Rrugor, penalizohen rëndë me gjobë dhe heqje të patentës drejtuesit e mjeteve që nuk përdorin sistemet fiksuese për fëmijet.
“Nëse jeni drejtues mjeti dhe keni një fëmijë nën 4 vjeç, atëherë duhet të mbahet në sediljen e pasme me sistem fiksimi. Nëse është mbi 4 vjeç, fëmija qendron në sediljen e pasme vetëm me rrip sigurimi”, sqaron Gjoka.
Por, nëse drejtuesi i mjetit për arsye të ndryshme vendos të mbajë fëmijën (4-12 vjeç) në sediljen e parë, duhet të ketë sistem fiksimi.
Nga vendosja e detyrueshme e rripit të sigurimit përjashtohen mjetet e transportit publik, pra urbanët që lëvizin në qytete.
