TIRANË- Është dërguar në Gjermani për tu analizuar karta e memories e kameras së sigurisë së helikopterit të FA që u rrëzua në liqenin e Shkodrës.
Grupi i prokurorëve që po heton aksidentin ajror ku humbën jetën dy pilotë ushtarakë ka kërkuar asistencë gjermane për të ekzaminuar kartën e memories.
Burime pranë grupit hetimor thanë se ç’kodimi mund të bëhet në Gjermani, për shkak të specifikës dhe frikës se në vendin tonë ajo mund të dëmtohet.
“Vetëm pasi të shikohen të dhënat e regjistruara”, – thonë hetuesit – “mund të përcaktohet shkaku i aksidentit”.
Në regjimentin e Farkës policia gjyqësore sekuestroi dhe planin e fluturimit, të miratuar nga eprorët e dy pilotëve që humbën jetën, Donald Hoxha dhe Floran Delia. Prokuroria e Shkodrës po heton për shkeljen e rregullave të fluturimit dhe për lëvizjen e trupave pa të drejtë nga eprorët e pilotëve në regjimentin e Farkës.
