Helikopterit tip “EC 145”, me numër bordi 637 që u rrëzua sot në Liqenin e Shkodrës, duke iu marrë jetën dy pilotëve, është i programuar enkas që të qëndrojë edhe mbi ujë dhe për këtë ka dy jastëkë të posaçëm ajri.
Por këto të fundit duket se nuk janë hapur sot.
Agjentë të policisë që mbërritën në zonën ku u rrëzua helikopteri ushtarak, në Malësinë e Madhe, kanë shoqëruar banorët e zonës që u përpoqën të shpëtonin pilotët.
Mësohet se, agjentët kanë bërë shoqërimin e banorëve në orët e pasdites për të marrë dëshmitë e tyre. Ndërkohë, burime ushtarake dhe policore bëjnë të ditur se kutia e zezë e helikopterit ndodhet ende brenda mjetit dhe nuk do të hiqet pa ardhur ekspertët e kompanisë Eurocopter, shkruan TCH.
Nga të njëjtat burime mësohet edhe një detaj lidhur me ngjarjen, se jastëkët e ajrit nuk janë hapur në momentin e përplasjes së mjetit me ujin. Gjithësesi do të jenë hetimet e mëtejshme që do të hedhin dritë mbi sa ka ndodhur.
