Një 5-vjeçar është shpëtuar mesditën e kësaj të hëne nga policia pasi rrezikonte të binte nga kati i pestë i një pallati.
Nga uniformat blu mësohet se një qytetar ka ngritur alarmin dhe ka njoftuar policinë përmes një telefonate, të cilët kanë mbërritur në vendngjarje duke i shpëtuar jetën të miturit.
Sipas informacioneve zyrtare, 5-vjeçari kishte hipur dhe ngecur në parvazin e dritares në një moment që familjarët nuk kishin qenë me të në atë dhomë.
“Falë reagimit të menjërshëm, pas telefonatës nga një qytetar, shërbimet e Policisë shpëtojnë një fëmijë 5 vjeç që rrezikoi të binte nga dritarja e katit të pestë të pallatit.
Rreth orës 13:00, në sallën operative, ka telefonuar një qytetar për të kërkuar ndihmë, pasi në lagjen “Skënder Libohova”, Lushnjë, një fëmijë po rrezikonte të binte nga dritarja e katit të pestë të pallatit.
Menjëherë pas telefonatës, salla operative ka koordinuar veprimet me shërbimet e Patrullës së Përgjithshme që patrullojnë në këtë zonë, të cilat kanë shkuar brenda pak minutash në adresën e dhënë.
Falë ndërhyrjes së menjëhershme të shërbimeve të Policisë është shpëtuar fëmija 5 vjeç që kishte kishte hipur dhe kishte ngecur në parvazin e dritares, në një moment që familjarët nuk kishin qenë ne atë dhomë”, tha policia./Opinion.al
